Flowers Symphony е авторски проект на Оркестар DIVA, осмислен како тематска симфониска програма што ги обединува класичната музика и популарните вокални дела во единствен сценски концепт инспириран од мотивот на цвеќето – како симбол на емоција, поврзаност и човечка чувствителност. 

Проектот за првпат беше реализиран во 2025 година на археолошкиот локалитет Хераклеја во Битола, каде концертот го следеа повеќе од 3000 посетители. Истата година, Flowers Symphony беше изведен и во Скопје, во Македонската филхармонија, пред целосно исполнета сала. Со овие две изданија, проектот го означи своето прво појавување пред поширока публика и постави основа за негов понатамошен развој како посебен концертен формат.

Во центарот на проектот е симфониската изведба на познати италијански канцони и класични вокални композиции, меѓу кои „Con te partirò (Time to Say Goodbye)“, „O Sole Mio“, „O Mio Babbino Caro“, „Flower Duet“, како и други дела со лирска и романтична тематика. Програмата е внимателно структурирана за да создаде континуирана музичка приказна, надополнета со визуелен амбиент и сценска атмосфера што го следи концептот на проектот.

Целиот концепт на Flowers Symphony, како и симфониските аранжмани на изведените композиции, се авторско дело на Владимир Димовски, кој воедно беше и диригент на концертите. Како солисти настапија Зана Абази Рамадани, Виолета Арсовска и Јаворка Витанова, а на двете изданија учествуваа и специјални гости: во Хераклеја гостинка беше светски познатата виолончелистка Ана Руцнер, додека на концертот во Скопје настапија Полина Тасева и Камелија Дукова.