Оркестар DIVA го најавува „Д Бест оф Битола“ за 3 јули. Програмата ќе ги собере Чоканче, Паркети, Brass Brothers, CODE369, Гром и Бранислав Николов од „Фолтин“, заедно со оркестарот.
Концертот е посветен на битолските изведувачи и на музичката сцена на градот. По концертните настапи е најавена и диџеј-програма како продолжение на вечерта.
Градот од кој потекнуваме
Овојпат во средиштето е градот од кој потекнуваме и изведувачите што го обликуваат неговиот музички живот. Битола отсекогаш била град на музика: град со богата концертна традиција, со бендови, авторски проекти и изведувачи што ги знае и публиката надвор од неговите граници. Со „Д Бест оф Битола“ сакаме таа сцена да ја претставиме на една сцена, во една вечер.
Различните бендови и авторски изрази ќе се сретнат со оркестарска придружба, во програма што ги поврзува нивните песни и нашата изведба. Секој од гостите носи свој звук, свој стил и своја публика, а оркестарот е мостот што ќе ги поврзе во една заедничка приказна.
Вечер на заедништво
„Д Бест оф Битола“ го подготвуваме како заедничка вечер со локалната сцена и со публиката што со години ја следи и поддржува. Тоа е наш начин да им се заблагодариме на музичарите со кои го делиме градот и да покажеме колку е богата и разновидна битолската музичка сцена.
Познати лица на нашата сцена
Многу од гостите на „Д Бест оф Битола“ веќе ја делеле сцената со оркестарот. Бранислав Николов од „Фолтин“ настапи на рок-вечерта на „Balkan Gala“ во 2021 година, Паркети и Brass Brothers беа дел од „Stars Symphony“ на стадионот во 2024 година, а хитовите на Чоканче се најдоа на програмата на „Македонска рок симфонија“. Сега сите тие се собираат во една вечер посветена на градот.
Летната вечер ќе продолжи и по концертните настапи, со диџеј-програма што ќе ја заокружи прославата. Повеќе детали за локацијата, почетокот и билетите ќе објавиме во наредните недели. Запишете го 3 јули и подгответе се за вечер посветена на Битола и на нејзината музика.


