„Barcelona“ ќе одекне во Филхармонија: Наде Талевска и Бојан Стојков го изведуваат славниот дует на „Flowers Symphony 2“

На 16 ноември, на „Flowers Symphony 2“ во Македонската филхармонија, Наде Талевска и Бојан Стојков со Оркестар DIVA го изведуваат дуетот „Barcelona“ на Фреди Меркјури и Монсерат Кабаље.

Објавено 2 мин. читање

Сподели Facebook WhatsApp Е-пошта Линкот е копиран

Еден од најпосебните моменти на „Flowers Symphony 2“ ќе биде славниот дует „Barcelona“. На 16 ноември, во Македонската филхармонија, ќе го изведат Наде Талевска и Бојан Стојков, заедно со Оркестар DIVA, под диригентство на Владимир Димовски. Тоа ќе биде прв пат Оркестар DIVA да го изведе овој дует пред скопската публика.

Желбата на Фреди Меркјури

Приказната за „Barcelona“ започнува со една желба. Фреди Меркјури долго време бил восхитен од гласот на оперската дива Монсерат Кабаље. Во едно телевизиско интервју во 1986 година зборувал за нејзиниот глас и за желбата да ја запознае. Неговите зборови стигнале до неа, а двајцата се сретнале во Барселона, во март 1987 година.

Она што Меркјури првично го замислил како соработка на една песна, прерасна во цел албум, откако Кабаље предложила да снимат повеќе. За него тоа беше остварување на личен музички сон и нов творечки предизвик. Песната е снимена во април 1987 година, а првпат заедно ја изведоа во мај истата година на Ибица. Одличниот прием ги охрабри да продолжат, а албумот беше објавен во 1988 година.

Химна на еден град

Неколку години подоцна, „Barcelona“ стана тесно поврзана со Олимписките игри во Барселона во 1992 година и прерасна во еден од музичките симболи на градот. Песната и денес ја слушаме како средба на два света: рок-сцената и оперската сцена, кои во неа се среќаваат на рамноправна основа.

Тајната на нејзиното траење е во тоа како двата гласа се надополнуваат. Дуетот носи театралност, нежност и моќни заеднички делови, но остава и простор секој изведувач да внесе свое толкување, дури и во песна што сите ја знаат.

Вечер на легенди

Наде Талевска и Бојан Стојков, со оркестарот, ќе ѝ дадат на скопската публика можност „Barcelona“ да ја слушне во живо, во симфониско руво. Дуетот е дел од програмата на „Flowers Symphony 2“, вечер посветена на познатите италијански класици и на филмските теми, со музика од Енио Мориконе и Ханс Цимер, во изведба на оркестар, хор и солисти.

Концертот е на 16 ноември 2026 година, во 20 часот, во Македонската филхармонија.

Најавата првпат е објавена на Црнобело, 29 октомври 2026.